Nos Servicio

Servicio na Defensa di Consumidor, en breve denomina ‘Sedeco’, ta un servicio dentro di gobernacion di Aruba, institui a traves di Landsbesluit entrante 1 di mei 2021, y ta cay bao di ministerio encarga cu proteccion di huur y consumidor, esta Ministerio di Asunto Economico, Comunicacion y Desaroyo Sostenible (Ministerie van Economische Zaken, Communicatie en Duurzame Ontwikkeling). E servicio pa prome biaha a keda institui via Landbesluit di 19 di november 1996 bao di e nomber ‘Bureau Huur- en Consumentenbescherming’ y na 2012 caba a experimenta un reorganisacion unda a cambia e nomber pa ‘Dienst Huur- en Consumentenzaken’. Sedeco ta e supervisor riba tereno ddi derecho di huur y asunto di consumidor, e ta encarga cu boga pa interes di inquilino y e consumidor riba tereno di proteccion di huur, respectivamente di consumidor.

Nos mision

Mision di Sedeco ta encera e actualizacion di proteccion di huur y consumidor, conscientiza e inquilino y e consumidor encuanto nan derecho y obligacionnan, e apoyo di organisacion di huur y consumidor y e maneho di un politica efectivo di supervision y investigacion, pa por sigura e miho proteccion di huur y consumidor.

Nos vision

E vision di SEDECO ta formula como lo siguiente: percura pa e inquilino y e consumidor den comunidad na tur ocasion ta ser trata honestamente y ta dispone di e informacion y educacion necesario pa por haci escoho rasonabel, por eherce su derechonan y pa por huur y consumi di manera responsabel y duradero, loke lo contribui na un medio ambiente mas saludable pa futuro generacionnan.

Nos obhetivo

SEDECO tin como obhetivo promove interes di inquilino y consumidor, garantisa un nivel halto di proteccion di huur y consumidor, contribui na proteccion di interes social, huridico y economico di e consumidor, como tambe promocion di nan derecho di informacion, formacion y asociacion pa boga pa nan interes.