Es cu ta trece un producto riba mercado, ta tuma un riesgo. Pasobra cu tur producto por tin algo robez. Por ehempel, e producto mes no ta bon. O e ta daña demasiado lihe. Pero por ta tambe cu ta surgi daño pa via di e producto. Manera si por ehempel e bateria den bo telefon rementa. O si tin glas den e pinda. Responsabilidad pa producto ta tocante e daño cu ta ocasiona a traves di esaki. Pues no tocante e producto defecto mes.

Responsabilidad pa producto ta un concepto amplio. Den ley ta para cu un productor en principio ta responsabel pa daño causa pa un defecto den su producto. Pero un productor no ta solamente e fabricante di e producto final. Bao di ‘productor’ ta cay tambe un productor di un materia prima o un pieza. O un persona cu ta presenta su mes como productor a traves di pone su nomber o marca riba un producto.

Responsabilidad pa producto (Buki 6 BW, titulo 3 Acto ilegitimo)

ARTICULO 185

E productor ta responsabel pa e daño, ocasiona pa un defecto den su producto, a menos cu:

E no a trece e producto den circulacion;

ta, tumando na cuenta e circunstancianan, plausible cu e defecto cu a causa e daño, no tabata existi na e momento cu el a trece e producto den circulacion, o cu e defecto a surgi despues;

e producto a ser fabrica, ni pa benta o pa algun otro forma di distribucion cu un meta economico di e productor, ni a ser fabrica ni distribui den cuadro di e ehercicio di su profesion o empresa;

e defecto ta consecuencia di e hecho cu e producto no ta den cumplimento cu regla obligatorio gubernamental;

a base di e estado di conocimento cientifico y tecnico, na e momento cu el a trece e producto den circulacion, tabata imposibel descubri e existencia di e defecto;

pa loke ta toca e productor di un materia prima o productor di un pieza, e defecto ta culpa di e diseño di e di cual e materia prima o pieza ta forma parti, o di e instruccion(nan) cu e fabricante  di e producto a suministra.

E responsabilidad di e productor ta keda disminui, o elimina, tumando na cuenta tur circunstancia, si e daño ta causa tanto pa un defecto den e producto como pa culpa di e esun perhudica, o un persona pa ken esun perhudica ta responsabel.

E responsabilidad di e productor no ta disminui, si e daño ta causa tanto pa un defecto den e producto como pa e comportamento di tercer persona.

ARTICULO 186

Un producto ta defectuoso, si e no ta ofrece e seguridad cu lo por spera di esey, tumando na cuenta tur circunstancia y en particular:

e presentacion di e producto;

e uso cu por spera, rasonabelmente, di e producto;

e momento cu a trece e producto den circulacion.

No por considera un producto defectuoso, exclusivamente pasobra posteriormente a trece un miho producto den circulacion.

ARTICULO 187

Bao di producto ta comprende, pa aplicacion di articulo 185 te cu, inclusive 193, un bien mueble, tambe depues cu esaki a bay forma parti di un otro bien mueble o inmueble, como tambe electricidad, tal cu excepcion di producto agricola y producto di caza (jacht). Bao di producto agricola ta comprende producto di tera, di cria di animal y di pesca, cu excepcion di producto cu a pasa den un prome elaboracion o proceso.

Bao di productor ta comprende, pa aplicacion di articulo 185 te cu, inclusive 193, e fabricante di un producto final, e productor di un materia prima o e fabricante di un pieza, como tambe tur esnan cu ta presenta nan mes como productor a traves di pone su nomber, su marca o algun otro signo distintivo riba e producto.

Sin perhuicio di e responsabilidad di e productor, tur esnan cu importa un producto localmente pa bende esaki, pa pone na huur, pa lease, o di otro forma suministra esaki den cuadro di su actividadnan comercial, ta ser considera productor; su responsabilidad ta e mesun cu di e productor.

Si acaso no por establece ken ta e productor di e producto, tur suministrador ta ser considera productor di esaki, a menos cu e ta informa esun perhudica dentro di un periodo rasonabel encuanto e identidad di e productor o di esun cu a suministra na su persona e producto. Si den caso di un producto importa localmente no por determina ken ta e importador di e producto ey ta, igualmente ta considera cada suministrador como productor, a menos cu e ta informa esun perhudica dentro di un periodo rasonabel encuanto e identidad di e importador cu a importa e producto localmente, o di un suministrador estableci localmente, cu a cu a suministra e producto na su persona.

ARTICULO 188

E persona perhudica mester proba e daño, e defecto y e vinculo causal entre e defecto y e daño.

ARTICULO 189

Si diferente persona, a base di articulo 185, inciso uno, ta responsabel pa e mesun daño, cada un di nan ta responsabel pa e totalidad.

ARTICULO 190

E responsabilidad, na cual ta referi den articulo 185, inciso uno, ta existi pa:

daño pa morto o lesion corporal;

daño causa pa e producto na un otro asunto cu ta destina pa uso o consumo den ambiente priva y cu principalmente a ser usa o consumi pa e persona perhudica den ambiente priva, cu aplicacion di un franchise di 1250 florin.

E suma, menciona den e prome inciso, por ser adapta, a traves di landsbesluit houdende algemene maatregelen (decreto nacional, di medida general).

ARTICULO 191

E demanda hudicial pa pago di daño y perhuicio na e persona perhudica contra e productor, segun articulo 185, inciso uno, ta caduca despues di transcurso di tres aña despues di inicio di dia, siguiente di esun riba cual e persona perhudica a haya conocimento di e daño, e defecto y e identidad di e productor, o mester a haya sa.

E derecho riba pago di daño y perhuicio di e persona perhudica contra e productor segun articulo 185, inciso uno, ta caduca despues di transcurso di diez aña despues di inicio di e dia, siguiendo riba e dia riba cual e productor a trece e asunto cu a ocasiona e daño, den circulacion. Mescos ta conta pa e derecho di tercer persona cu ta coresponsabel pa e daño, den caso di  recurso contra e productor.

ARTICULO 192

E responsabilidad di e productor a base di e seccion aki pa cu e persona perhudica no por ser exclui o limita.

Si pa cu e persona perhudica tambe tin un tercer persona responsabel, cu no ta usa e producto den ehercicio di un profesion o empresa, anto no por desvia na desbentaha di e tercer persona ey di e reglanan encuanto e recurso.

ARTICULO 193

E derecho riba pago di daño y perhuicio contra e productor a base di e seccion aki ta atribuibel na e persona perhudica, sin perhuicio di tur otro derecho o demanda.