Huurcommissie ta un comision independiente institui via decreto nacional (landsbesluit) cu ta dicidi den disputa entre inquilino y propietario. Huurcommissie ta existi caba desde 1939 cu e entrada na vigor di e areglo di huurcommissie (Huurcommissieregeling), pero pa motibo di e trabao creciente di e comision a institui na 1996 e Bureau Huur- en Consumentenbescherming pa apoya e Huurcommissie, y cu ta tambe e supervisor di cumplimento di derecho di huur y consumidor. E servicio anto no tin influencia riba e veredictonan di e Huurcommissie, pero ta funciona solamente como secretariado pa e comision.

Pa implementacion di su tarea di apoyo na e Huurcommissie nos colaboradornan por asisti e cliente den redacta y entrega un peticion na Huurcommissie. A base di titulo 7.4 di Codigo Civil di Aruba e peticionario por haci dos peticion diferente na Huurcommissie, esta:

• Un peticion pa stipula e prijs di huur maximo di e vivienda, respectivamente e espacio empresarial (ex art. 7:240 BWA resp. art. 7:274 jo. 7:240 BWA);
• Un peticion pa permiso pa termina e convenio di huur (ex art. 7:248 BWA).

Manera menciona aki riba, Sedeco ta ofrece sosten administrativo na e Huurcommissie. Esaki nos ta haci a traves di registra e peticion, informa e partidonan di e fechanan di sesion via telefon o mensahe di Whatsapp), manda convocacion pa sesion, manda e disposicion di Huurcommissie na e partidonan concerni. Sedeco ta anto e punto di contacto pa e partidonan, pero no tin influencia riba e veredicto, e agenda o e manera di traha di Huurcommissie mes.

Actualmente ta existi solamente un Huurcommissie, cu ta duna veredicto den disputa riba tereno di derecho di huur. Sin embargo ta existi e intencion di institui un comision di disputa (geschillencommissie) pa soluciona e demas disputanan di consumidor. Pa mas informacion tocante Huurcommissie, click aki.

Pa entrega un peticion na Huurcommissie, click riba e link corespondiente: