Introduccion

E derecho y obligacionnan di e inquilino por haya nan den e articulonan 7:212-225 BWA. Esakinan ta:

• Cumpli cu e contraprestacion conveni (art. 7:212 BWA)
• Comporta su mes como bon inquilino (art. 7:213-216 BWA)
• Haci reparacion chikito pa su propio cuenta (art. 7:217 BWA)
• Responsabilidad pa daño causa pa mal prestacion di e inquilino o pa comportamento di tercer persona cu ta keda den loke a huur cu conscientimento di e inquilino (art. 7:218-219 BWA)
• Permiti obra urgente o renobacion di parti di e propietario (art. 7:220 BWA)
• Facultad pa duna na huur loke ta huur na tercer persona (onderhuur) (art. 7:221 BWA)
• Obligacion di notifica defecto inmediatamente (art. 7:222 BWA)
• Obligacion pa colabora den caso cu e propietario ta desea di bende loke ta huur (art. 7:223 BWA)
• Pone loke ta huur na disposicion na final di e periodo di huur (art. 7:224-225 BWA)

Cumpli cu Contraprestacion, art. 7:212 BWA

Manera por conclui di e definicion di e convenio di huur, e pago di huur ainda ta e obligacion principal di e inquilino. Esaki mester ta paga na tempo y di e manera acorda.
E inquilino mester ser ‘declara den defecto (‘in gebreke stellen’), o e ta den incumplimento pa ley? Hopi biaha e ultimo aki ta e caso, pasobra e ultimo dia riba cual e pago periodico mester ta haci, ta usualmente parti di e convenio di huur entre e partidonan. Esaki ta anto un termino fatal conveni den sentido di articulo 6:83, sub a BWA y por lo tanto e incumplimento ta bira efectivo pa ley.
No paga, o no paga na tempo di huur ta en principio resulta den incumplimento legal (wanprestatie). Si e propietario ta desea di disolve e convenio di huur pa via di mal pagamento, esaki mester ta suicientemente grave pa hustifica disolucion (art. 6:265 BWA). Den hurisdiccion encuanto huur ta considera un retraso di tres luna o e pago laat regularmente como suficientemente grave.

Comporta como bon inquilino art. 7:213 BWA

Bon conducta como inquilino ta un concepto di e articulo anterior 7A:1577 BWA y ta un norma hopi amplio, pa cual pa cada caso ta determina kico ser bon inquilino ta encera. E stipulacion ta entre otro referi na e forma di uso: nada di porqueria, nada di demasiado habitante, no causa molester. Aunke e articulo ta duna un norma hopi habri, ta haya esaki den e demas stipulacionnan encuanto e obligacionan di e inquilino.

Uso conforme proposito (bestemming), art. 7:214 BWA

E proposito contractual ta determina a base di e intencion di partidonan na momento di cera e convenio (criterio Haviltex). Si no a acorda nada encuanto e proposito, anto por deduci esaki di e indole di loke ta huur y e uso factual. Ora ta usa loke a huur en pugna di e proposito, anto esey en principio ta un forma di incumplimento di contrato, cu ta hustifica disolucion. Den e tipo di disputa aki ta depende si e incumplimento ta hustifica e disolucion. Adaptacion chikito den uso no ta base pa cambio di proposito.

Cambio haci pa inquilino, art. 7:215-216 BWA

A base di articulo 7:215 BWA ta vigente e regla principal cu e inquilino no ta faculta pa cambia e areglo di e interior o forma di loke ta huur. E stipulacion aki ta di caracter semi-obligatorio (art. 7:215 inciso 6 BWA). Seguidamente aki algun excepcion importante di e regla principal aki:

Permiso
Cambio ta permiti si e inquilino tin permiso por escrito di e propietario (art. 7:215 inciso 1 BWA). Si e propietario no ta duna permiso (dentro di ocho siman) y ta trata di huur di un vivienda, e inquilino por bay huez pa demanda y cu esaki ta autorisa su persona pa haci cambio (art. 7:215 inciso 3 BWA). Huez lo concede e demanda si e propietario a base di inciso 2 lo mester a duna permiso. Den otro caso huez lo concede e demanda solamente, si e cambionan ta necesario pa un uso util, o si esaki ta aumenta e gozo y no tin interes di peso di banda di e propietario cu ta resisti esaki (art. 7:215 inciso 4 BWA). Huez por añadi condicion na e autorisacion o impone un encargo. E por, riba demanda di e propietario, aumenta e prijs di huur, si e cambionan ta indica esey (art. 7:215 lid 5 BWA).

Conforme articulo 7:215 inciso 1 BWA , ta permiti cambio tambe si ta trata di cambio cu na final di e huur por kita sin mayor costo. Pensa por ehempel riba pega spiel na muraya cu schroef di cual e buraconan mester keda cubri. Pa esaki anto no mester di permiso.

Parti exterior vivienda
Pa loke ta cambio haci pa e inquilino na banda exterior di un vivienda, ta vigente e regla principal di articulo 7:215 BWA, a menos cu e partidonan a conveni algo otro.

Kita loke a pone
E inquilino ta faculta durante henter e periodo di huur te na desocupacion, pa kita e cambionan cu el a pone, basta cu esey ta rasonabelmente trece loke e ta huur den su estado original atrobe. (art. 7:216 BWA). Encuanto e cambionan permiti cu na final di e periodo di huur e inquilino no kita, e por, dentro di e limitenan di articulo 6:212 BWA, demanda un compensacion (enriquecimento no hustifica).

Reparacion chikito, art. 7:217 BWA

Reparacion diario y chikito ta core pa cuenta di e inquilino, lo demas ta core pa cuenta di e propietario, a traves di e areglo di defecto (gebrekenregeling), (art. 7:217 BWA). Ta trata aki di reparacion cu sa ta necesario como consecuencia di loke usualmente ta sucede den uso normal di un inquilino.

Loke esaki por ta, ta depende di loke e partidonan a conveni y a inclui den e convenio. Na Hulanda ta vigente e ‘Besluit kleine herstellingen’, cu ta obligatorio pa vivienda y ta duna un resumen no limitativo di e mantenimento chikito aki. Punto di salida den esey ta cu e inquilino mester por haci e reparacion ey y cu e trabao di reparacion no ta trece costo considerable cune. Na Aruba no tin un areglo comparable, pero e por sirbi sí como ehempel o inspiracion den determinacion di e obligacionnan di mantenimento mutuo. Un ehempel di reparacion chikito cu ta core pa cuenta di e inquilino ta:

• ferf muraya paden;
• yena buraco;
• pega cu schroef un pieza los, chikito;
• laga service e airconan regularmente;
• regularmente (laga) haci e pos bashi;
• mantene e cura;
• combati plaga;
• regularmente mantene limpi e gootnan y sistema di desague, etc.

Responsabilidad di inquilino (inquilino), art. 218-219 BWA

E inquilino ta responsabel pa daño ocasiona pa e mes o tercer persona ken, cu su consentimento ta permanece na loke ta huur, o cu su consentimento ta presente ey. (art. 7:218 en 219 BWA). Ta supone cu e inquilino a ricibi loke ta huur den un estado liber di daño y pues ta supone cu tur daño ta ocasiona pa e inquilino (o pa un tercer persona pa ken e ta responsabel). Esaki ta solamente diferente den caso di daño di candela o – den caso di asunto di inmueble construi – den daño na parti exterior di loke ta huur. E inquilino lo mester entrega anto prueba contrario, cu excepcion si a conveni di forma diferente den e descripcion di e estado na momento di aceptacion na inicio di e huur, a base di articulo 7:224 lid 2 BWA).

Reparacion y renobacion, art. 7:220 BWA

E articulo aki ta regla e casonan den cual e inquilino mester permiti obra na loke ta huur. No ta trata solamente di reparacion urgente, sino tur actividad, tambe esun di reparacion di daño o pa preveni daño. E obligacion di permiti di e inquilino ta encera e obligacion permiti e propietario entrada na loke ta huur pa evalua si, y si esey ta confirmativo, cual obranan mester ser haci, y tambe ta tene cuenta cu e posibilidad cu e propietario di un cura cerca ta apela na articulo 5:56 cu cual e propietario ta obliga di cumpli. Segun e prome inciso di articulo 7:220 BWA, e inquilino mester tolera obra urgente, sin perhuicio di su demanda di reduccion di e prijs di huur, di disolucion y pago di daño y perhuicio.
E segundo inciso ta regla e obligacion di permiti di e inquilino relaciona cu renobacion. Punto di salida ta cu e propietario ta presenta na e inquilino un proposicion porr escrito. E proposicion mester ta rasonabel, tumando na cuenta e interesnan di e inquilino y di e propietario. Den esey ta hunga un papel e indole di e obranan, e necesidad di e cooperacion di e inquilino, e consecuencianan financiero pa e propietario, e aumento di e prijs di huur pa e inquilino, e posibilidad di un obheto di huur como reemplaso pa e inquilino y e demas circunstancianan di e caso. E propietario lo mester afirma y caso dado, mester proba cu su proposicion ta rasonabel.
E di tres inciso ta mustra riba e posibilidad di termina e convenio, en vista di e renobacion, a traves di notifica renuncia di e convenio. E propietario mester tuma na cuenta e termino di preaviso cu ta aplicabel (art. 7:228 BWA), y ademas ta rekeri permiso pa e propietario di huurcommissie pa termina e huur (art. 7:248 BWA).

Onderhuur, art. 7:221 BWA

Encuanto ‘onderhuur’ ta vigente e regla principal cu e inquilino no ta faculta pa duna loke ta huur completa o parcialmente na huur na otro persona. Si ta trata di un parti di habitacion riba su mes unda e inquilino tin su vivienda mayor, e inquilino sí ta faculta pa huur un parti di esey cu otro, a menos cu e por supone cu e propietario lo tin obhecion rasonabel. E stipulacionnan aki ta di aplicacion corespondiente riba ‘bruikleen’ (derecho di uso sin pago).
Den caso di ‘onderhuur’ tin dos pregunta hopi frecuente:

1. Kico ta pasa si e inquilino no ta faculta pa onderhuur y ta haci esey?

Onderhuur sin autorisacion ta duna den e relacion entre inquilino y propietario incumplimento contractual loke ta hustifica disolucion (art. 7:213 BWA). E convenio di onderhuur ta un convenio normal. Entre esun cu ta inquilino den onderhuur y e inquilino principal ta conta e derecho y debernan normal. Pa constitui un convenio di huur valido no ta rekeri cu e esun cu ta duna e espacio na huur ta faculta pa cera e convenio di huur. Si esun cu ta duna e onderhuur no por facilita uso, pasobra e convenio principal di huur a termina, esaki no tin influencia riba validez di e convenio di onderhuur, pero ta haci cu esun cu ta duna e onderhuur, ta comete incumplimento contractual.

2. Kico ta pasa cu e inquilino di onderhuur den caso di terminacion di e huur principal?

Ora e convenio di huur principal termina, e inquilino cu ta duna onderhuur no por facilita uso mas y esun cu ta haya onderhuur ta en principio sin derecho o titulo pa cu e propiedad na huur. Un orden di desocupacion en principio por ser ehecuta tambe contra un inquilino di onderhuur, pasobra semper ta demanda y ta concede e desocupacion contra e inquilino y ‘cu tur persona y bienes perteneciente na e (inquilino principal). E inquilino di onderhuur ta cay bao di e ‘personanan perteneciente na e’.

3.3.10 Obligacion di notifica encuanto defecto, art. 7:222 BWA

Den caso cu e inquilino ta descubri defecto na e asunto, o si tercer persona ta strob’e den su gozo, o ta pretende di tin un derecho encuanto e asunto, e mester notifica e propietario inmediatamente, pa e propietario tin oportunidad di actua na tempo contra esaki. Si e inquilino ta keda sin cumpli cu e obligacion di notifica aki, anto e ta obliga di compensa daño cu surgi.

3.3.11 Obligacion di coopera den caso di benta, art. 7:223 BWA

Dn caso cu e propietario ta desea di bende e obheto di huur, e inquilino ta obliga di permiti cu ta pone un borchi di ‘ta bende’ y cu ta tuma luga bishita di revision. E obligacion aki ta papia pa su mes, pero ta inclui explicitamente den ley pa via di e derecho di privacidad y e derecho di hogar (art. 10 en 12 Constitucion).

3.3.12 Entrega, art. 7:224-225 BWA

Loke ta huur mester ta, na final di e termino di huur, poni na liber disposicion di e propietario (art. 7:224 BWA). Den ki estado loke ta huur mester ta entrega ta depende di loke partidonan a conveni pa esaki.

Entrega cu descripcion
Den caso cu partidonan na ciere di e convenio a traha un descripcion, por ehempel un rapport di inspeccion, e inquilino ta obliga di entrega loke ta huur den e mesun estado, cu excepcion di deterioro pa via di tempo y cambionan cu tabata permiti.

Entrega sin descripcion
Si no a traha un descripcion, ta supone cu e inquilino, salvo prueba contrario, a ricibi loke ta huur den bon estado y ta obliga pa debolbe esaki den e mesun estado. Ta asumi como regla cu e inquilino di un vivienda ta obliga pa ferf e parti interior di loke ta huur (despues di consulta e propietario).

Desocupacion laat
Si e inquilino na final di e huur ta mantene loke ta huur di forma ilegitimo bao di su poder, anto e propietario, a base di articulo 7: 225 BWA, por demanda un compensacion pa e tempo cu e no tabata dispone di loke ta huur, cu ta igual na e prijs di huur, sin perhuicio di su derecho riba eventual daño y perhuicio adicional.