Busca Facebook

Compra di consumidor

Codigo civil ta proteha e consumidor. E areglo concerni, compra di consumidor, ta establece e derechonan di e consumidor, pero tambe e obligacionnan di e bendedo. No tur convenio di compra ta cay bao di e reglanan di compra di consumidor. Mester ta trata di un compra entre un bendedo profesional y un “cumprado no profesional”. Ley ta yama esaki “no actua den ehercicio di un profesion o empresa”. Como regla principal den compra di consumidor ta conta cu e asunto entrega mester coresponde cu e convenio. Un asunto ta coresponde cu esaki si e ta posee e caracteristicanan cu e cumprado a base di e convenio di compra por a spera. Aunke e regla aki ta hopi vago, mester determina segun esaki kico ta e posicion huridico di ambos partido. En corto, ken tin razon.

Tur hende lo mester (taba)tin un diferencia di opinion cu un bendedo. E diferencianan di opinion ey por ta diverso. Tin biaha ta trata di e calidad di un articulo, tin biaha e costo di servicio o e stipulacionnan di garantia. Sin duda lo bo conoce e storianan di auto daña, television cu no ta funciona, set di sala cu no tin e color corecto o ta gasta lihe y tapijt malo. A pesar cu hopi bendedo ta trata cliente corectamente, toch ta surgi bastante disputa tocante e tipo di asunto aki.

Obligacion di e bendedo

E bendedo ta obliga di entrega e producto na e cumprado. Cu esaki, e cumprado ta bira propietario. Si e consumidor ta paga despues o ta paga na cuota, anto e bendedo por rekeri cu e ta keda propietario te ora el a ricibi e suma di compra completo di e cumprado.

E bendedo ta obliga di entrega un producto cu ta coresponde cu e convenio di compra:

1. E producto mester cumpli cu e caracteristicanan cu bo por spera den uso normal. Cu un auto bo mester por core y brake. Riba un pc bo mester por sin problema opera un programa di procesa texto.

2. E cumprado mester por spera cu un producto tin e caracteristicanan cu cual e bendedo a compromete. Si e cumprado por ehempel a conta cu e mester un auto pa bay Ardennen cu su caravan, anto e auto mester ta capaz di haci esey. Por ta importante anto pa conta e bendedo pakico lo usa e producto.

3. Un bendedo no ta mara solamente na su propio anuncionan. Si e fabricante ta haci propaganda pa su producto, e cumprado por deriva derecho di esey (mira tambe “Garantia”). Si e producto no ta coresponde cu e caracteristicanan priminti den e propaganda, anto e cumprado por en principio confronta e bendedo cu esaki.

4. Si e bendedo ta percura pa instalacion di e producto, pero e ta haci e instalacion di manera deficiente, anto esaki ta conta como un deficiencia den corespondencia di e producto cu e convenio. Igualmente esaki ta conta pa si e cumprado ta instala e producto su mes, pero e manual di instalacion ta presenta deficiencia, cu resultado final no satisfactorio.

Obligacion di e cumprado

A menos cu a acorda algo diferente, e pago di e suma di compra ta tuma luga na momento di recepcion di e producto. Si ta entrega e producto despues o no por hiba e producto mesora, anto e cumprado nunca lo ta obliga di paga mas cu mitar di suma di compra adelanta.

Si e cumprado no ta paga e suma di compra, o no ta paga esaki na tempo, anto e bendedo por exigi:

1. cu e cumprado ta paga e suma di compra ainda;
2. cu e cumprado ta compensa e costonan cu e bendedo mester a haci pa esaki (e asina yama costonan di cobro (incasso);
3. y, cu ta compensa e interes legal riba e suma di compra. E interes legal ta debi desde e dia cu e periodo di pago a vence.

Na luga di esaki e bendedo por exigi tambe cu ta disolve e convenio. Den e caso ey e por exigi compensacion pa e daño cu el a sufri.

Scroll To Top
© 2024 Servicio na defensa di consumidor (SEDECO) | Privacy | Cookies | Disclaimer