Den practica ta resulta cu e inquilino respectivamente e consumidor no semper ta logra, cu e informacion y conseho huridico corecto, pa resolve e disputa cu e propietario respectivamente e empresa. Esaki por tin diferente motibo, entre nan un relacion perturba o comunicacion dificil entre partido, un imagen ekiboca o falta di conocimento di ley di huur y consumidor, o maneho empresarial cu ta en pugna cu ley. Den tal caso Sedeco ta ofrece mediacion como un forma alternativo di termina disputa. E meta ta pa hiba un conflicto entre partido mas rapido na un solucion y no laga esaki yega te na un procedimento formal na Huurcommissie o cerca huez.

Den caso di mediacion Sedeco, despues di registracion di e reclamo, y suministro di informacion y conseho ta cuminza cu tuma contacto cu e consumidor pa haya un bon imagen di e aspectonan clave di e problema y pa puntra kico e ta mira como posibel solucion. Despues e consulent ta haci e mesun preguntanan na e otro partido. For di su experticio e servicio ta evalua e solucionnan proponi, encuanto ley y regulacion relevante. E solucion mas rasonabel ta ser poni na disposicion di ambos partido, unda nan por compromete nan mes cu esaki. Den un mediacion exitoso e proceso ta termina cu e convenio di determinacion (vaststellingsovereenkomst) entre consumidor y bendedo.

Sedeco ta usa e siguiente criterionan pa evalua si un disputa en principio ta susceptibel pa mediacion:

1. E caracter di e disputa ta adecuado pa mediacion;
2. Partidonan ambos ta bay di acuerdo cu mediacion, y ambos ta haci un esfuerzo activo pa logra yega na un solucion di e conflicto; y
3. E servicio tin suficiente capacidad pa mediacion.

Partidonan cu acudi na Sedeco cu e peticion di intermedia entre partido, ta declara di ta dispuesto pa traha acuerdo (un convenio di determinacion; vaststellingsovereenkomst) pa entre nan yega na un solucion. Partidonan cu acudi na Sedeco y ta pidi un veredicto di Huurcommissie, ta ser asisti den entrega di un peticion na Huurcommissie pa termina nan disputa.