E obligacionnan di e propietario (propietario) ta describi den articulo 7:203-211 BWA, unda e areglo di defecto ta para central. E obligacionnan aki ta:

• Pone y laga na disposicion di e obheto di huur (art. 7:203 BWA)
• Para responsabel pa deficiencia (art. 7:204, 206-210 BWA)
• Proteha e inquilino contra desorden legal (rechtsstoornis) (art. 7:2011 BWA)

Articulo 7:205 BWA ta stipula cu e derechonan cu ta atribui na e inquilino for di e seccion aki, ta consisti, banda di tur otro derecho y demanda, di derecho contractual general. Un ehempel di esaki ta e derecho di suspension, cu no ta inclui den e derecho di huur, pero si den Buki 6 BWA, loke ta si un recurso legal importante di e inquilino.

Pone y laga na disposicion

E obligacion aki tabata existi caba den e derecho anterior, solamente cu a bin acerca e elemento ‘laga’. Tambe a añadi e parti di frase cu mester pone na disposicion ‘asina leu cu ta necesario pa e uso conveni’. Cu esaki e legislador tabata kier a clarifica cu entrega total di e asunto no ta necesariamente un obligacion.

Pone na disposicion mester tuma luga na tempo. Ora cu esaki no a sucede, e propietario ta suheto na daño y perhuicio, sin cu mester notifica di e incumplimento, ya cu a viola un termino fatal (art. 6:83 sub a BWA).

Para responsabel pa defecto

Definicion

E areglo di defecto elabora den e articulonan 7:204-210 BWA. E definicion di e concepto ‘defecto’ den articulo 7:204 lid 2 BWA ta bisa:

‘Un defecto ta un estado o caracteristica di e asunto, o un otro circunstancia cu no ta pa cuenta di e inquilino, pa cual motibo e asunto no por brinda e gozo na e inquilino cu un inquilino na ciere di e convenio por spera di un asunto bon manteni di e tipo na cual e convenio ta referi.’

E concepto defecto ta anto un concepto hopi amplio, bao di cual ta cay no solamente defecto material, sino tambe defecto inmaterial. Un malentendido regular ta cu un defecto ta relaciona cu e asunto cu a huur. Esey ta incorecto. E concepto ‘defecto’ ta relaciona cu e ‘prestacion’ cu e propietario debe e inquilino a base di e convenio di huur, esta pone y laga na disposicion di e inquilino e asunto pa e uso intenciona. Bao di ‘defecto’ ta cay tur circunstancia cu ta limita gozo cu no ta pa cuenta di e inquilino.

Resolve

E propietario ta obliga pa resolve defecto, riba deseo di e inquilino, a menos cu esaki ta imposibel, o ta rekeri gasto cu den cierto circunstancia lo ta irasonabel (art. 7:206 inciso 1 BWA). Esaki ta conta tambe si e inquilino mes mester soluciona e defectonan aki, pasobra nan ta reparacion chikito den sentido di articulo 7:217 BWA, o si e inquilino mes ta responsabel pa surgimento di e defecto, a base di 7:213, 218, o 219 BWA. Aunke ni responsabilidad atribuibel, ni incumplimento ta rekeri pa por exigi di e propietario pa resolve e defecto (art. 3:296 BWA), e inquilino mester cumpli sí cu su obligacion di notificacion. Si e ta ignora esaki, e por bira responsabel pa daño consecuencial (gevolgschade) (art. 7:222 BWA).

Reduccion di prijs di huur

Den articulo 7:207 BWA ta skirbi cu tanten cu un defecto ta existi y ta trata di perhuicio di gozo, e inquilino desde e momento di notifica e propietario por demanda un reduccion equivalente di e prijs di huur. Esaki ta igual na un disolucion parcial, loke por haya den e derecho contractual general (algemene verbintenissenrecht) den articulo 6:270 BWA. Ta importante remarca cu e inquilino mester demanda e reduccion legalmente, esaki contrario na articulo 6:270 BWA, e no por limita su mes na un notificacion por escrito di disolucion. Banda di esey e norma di equivalencia ta haci cu solamente un afeccion sustancial di e gozo di huur por conduci na reduccion di huur. Finalmente mester tene cuenta cu e hecho cu e reduccion di huur ta inicia na e momento cu e inquilino ta notifica e propietario di e defecto, o cu e propietario ya tabata suficientemente na altura di esaki.

Disolucion

E inquilino, banda di e derecho di disolucion parcial, tambe tin derecho di disolve e convenio di huur completamente. Hopi biaha esaki no ta e miho opcion, ya cu e inquilino ta perde su luga di biba. Den cierto caso sin embargo, esaki por ofrece e miho opcion. E inquilino por disolve e convenio di huur a base di articulo 6:277 BWA, unda e propietario ta obliga di compensa e daño/perhuicio di disolucion. E disolucion total pa e inquilino sí por ser haci fuera di corte, segun articulo 6:267 BWA. Si e gozo di huur ta ser haci imposibel pa via di un defecto cu no ta pa cuenta di e propietario, por ehempel den caso di perdida completo di e asunto na huur pa un incidente casual, anto articulo 7:210 BWA ta ofrece e posibilidad di disolucion den o fuera di huicio, tanto pa e inquilino como pa e propietario. For di punto di vista di seguridad legal e convenio di huur no ta vence (mas) pa ley. Bao di imposibilidad total di gozo ta cay tambe e caso unda e gozo restante de hecho ta un otro gozo cu locual e inquilino por a spera.
Pa espacio habitacional (woonruimte) ta conta ademas articulo 7:210a BWA. Si den caso cu un parti necesario pa habitacion di e vivienda cu a huur ta bira inhabitable pa via di un defecto, o cu obra pa resolve e defecto lo haci o laga haci esaki ta causa esey, anto e inquilino por disolve e huur a base di articulo 6:267 BWA. E propietario mester compensa tur daño cu a surgi pa e demanda di disolucion (si a cumpli cu e obligacion di notifica) na e inquilino. E inquilino tin e mesun facultad pa disolucion ora uso di e vivienda cu a huur ta duna peligro (inciso 2). Contra e facultad menciona na ultimo no por desvia na desbentaha di e inquilino.

(Pago pa) Daño y perhuicio

Banda di e derecho di cumplimento o disolucion, e inquilino tin tambe derecho riba pago di daño y perhuicio. A base di articulo 7:208 BWA e responsabilidad di e propietario ta consisti di:

• Den caso di un defecto cu a surgi despues di cera e convenio: si e surgimento di esaki ta atribuibel na e propietario y despues cu el a ser poni na altura di esaki;
• Den caso di un defecto cu tabata existi caba ora cu a cera e convenio: si e propietario tabata conoce e defecto caba, mester tabata conoce, o a desmenti e presencia di tal.

Proteccion di inquilino contra desorden legal (rechtsstoornis)

Ora e inquilino keda involucra den huicio pa tercer persona cu ta reclama derecho encuanto e asunto na huur, por ehempel un derecho di servidumbre a base di cual e por cana pasa den e cura di e inquilino, anto e propietario tin e obligacion di yuda e inquilino a base di articulo 7:211 inciso 1 BWA, den e procedimento aki pa pasa den e disputa. E propietario den un caso asina ta obliga di compensa tur e gastonan cu surgi pa via di e demanda (art. 7:211 lid 2BWA).