Pa ofrece servicio o bende producto, e potencial cliente mester sa cu e producto o servicio ta na benta. E manera mas facil pa laga nan sa esey, ta haci propaganda. Pa esey tambe, sin embargo, tin regla: propaganda engañoso no ta permiti.

Propaganda ta consisti di (laga) haci un anuncio tocante bienes o servicio cu ta publica den ehercicio di un profesion o empresa. Ley ta duna si un serie di ehempel di punto unda engaño ta posibel y cu por percura anto pa propaganda engañoso:

Propaganda engañoso (Buki 6, titulo 3 Acto Ilegitimo)

Articulo 194

Es cu, encuanto bienes o servicio cu ta ser ofreci pa su persona o pa ken e ta actua den ehercicio di un profesion o empresa, ta haci publico o ta laga haci publico un anuncio, ta actua di forma ilegitimo si e anuncio aki ta engañoso den un o mas aspecto, manera encuanto:

1. e indole, composicion, cantidad, calidad, caracteristica o opcion di uso;
2. e origen o e momento di fabricacion;
3. e tamaño di e stock;
4. e prijs o e manera di calcula esey;
5. e motibo o meta di e oferta;
6. e condecoracion, certificado o otro evaluacion o declaracion haci pa tercer persona, o e terminologia cientifico o profesional, resultado tecnico o dato estadistico;
7. e condicionnan bao di cual ta entrega bienes o ta duna servicio o e pago ta tuma luga;
8. e alcance, contenido o duracion di e garantia;
9. e identidad, cualidadnan, capacidad o facultad y e persona pa ken, bao di ken su liderazgo o supervision o cu ken su colaboracion ta o a fabrica o ofrece e mercancia, o ta duna e servicionan;
10. comparacion cu otro bienes o servicio.

Articulo 195

1. Si ta entama un demanda a base di articulo 194 contra un persona cu a determina o laga determina completo o parcialmente contenido y presentacion di e anuncio, ta na su encargo pa proba encuanto exactitud o integridad di e hechonan cu ta conteni den e anuncio o ta sugeri pa esey, y riba cual e caracter engañoso die anuncia ta basa, salvo asina leu cu e reparticion di cargo di prueba ta irasonabel.
2. Si un persona a actua di manera ilegitmo segun articulo 194 cu a determina o laga determina e mes, contenido y forma di e anuncio completo o parcialmente, e ta responsabel pa e daño cu a surgi a causa di esey, a menos cu e proba cu tal no ta su culpa, ni ta core pa su cuenta di algun otro forma.

Articulo 196

1. Si un persona, a traves di haci publico o laga haci publico un anuncio describi den articulo 194, a causa daño na un otro o ta menaza di causa daño, huez por, riba demanda di e otro ey no solamente prohibi haci publico o laga haci publico tal anuncio, pero condena e persona na haci publico o laga haci publico, na un manera indica pa huez, di un rectificacion di e anuncio ey.
2. Si un demanda manera intenciona den e prome inciso, keda concedi contra un persona cu no ta alavez responsabel pa e daño na cual articulo 195, inciso dos, ta referi, anto articulo 167, inciso tres, ta di aplicacion corespondiente.