Un consumidor critico ta crucial pa promove crecemento economico y tambe pa garantisa producto di calidad halto y prijs rasonabel riba mercado. E consumidor critico ta stimula un funcionamento di mercado eficiente y efectivo.

Ken ta consumidor?

Un consumidor ta un persona cu ta cumpra un producto o servicio. Esaki ta un concepto amplio y por ta relaciona cu tur hende. Ley ta defini e cumprado (consumidor) como un persona natural cu no ta actua den ehercicio di un profesion o maneho di un empresa.

Un consumidor ta standard, pa definicion ta un usuario di bienes produci. E consumidor den sentido di derecho di consumidor ta un persona natural, consumidor, cu no ta actua como empresario o como representante di un persona huridico y cu cual un empresa, compania, ta haci negoshi.

Derecho di Consumidor

Derecho di consumidor ta encera e derecho relaciona cu e posicion huridico di un persona natural, cu no ta actua den ehercicio di un profesion o empresa. Pasobra ta considera un consumidor como e partido contractual economicamente debil y huridicamente menos experimenta, esaki merece haya proteccion contra e empresario cu tin mas conocimento di su producto y mas experiencia den asunto ci contrato. Mayoria di regla cu ta concerni convenio cera pa consumidor cu empresa ta di derecho obligatorio: no por desvia den desbentaha di e consumidor. Esaki contrario na derecho di convenio en general, cu tin e caracter di derecho complementario, regulatorio.

Derecho obligatorio: E legislador tin biaha ta impone ciudadano regla di cual nan no por desvia: regla di derecho obligatorio. Por ehempel riba e terenonan di derecho cu ta concerni e proteccion di e partido mas debil contra un partido mas fuerte; pensa riba derecho laboral y derecho di huur.

Derecho complementario: Banda di regla di derecho obligatorio por haya por ehempel tambe den Codigo Civil hopi regla di derecho complementario (‘regulatorio’). E legislador a traha esey por si acaso partidonan no ta yega na un areglo nan mes, pero ta laga e ciudadano liber pa segun nan propio pensamento, desviando di esey, yega na conveni un areglo. Si e ciudadanonan mes no yega na un areglo, anto e regulacion legal ta vigente.