Demas stipulacion relaciona cu tur obheto di huur

Traspaso no ta kibra huur

Regla principal
A base di articulo 7:226 inciso 1 BWA e sucesor legal (rechtsopvolger) di e propietario ta mara na e derecho y obligacionnan procedente di e convenio di huur, asina leu cu esakinan bira demandable despues di e traspaso. Bao di e ley anterior e regla aki tabata conoci como ‘compra no ta kibra huur’ (‘koop breekt geen huur’). Na luga di ‘compra’ a bin awor: traspaso di e asunto na huur y establecimento o traspaso di un derecho riba su mes di usufructo, erfpacht o construccion (‘opstal’) riba e propiedad na huur (inciso 1) y traspaso pa un acreedor di e propietario (inciso 2).

Excepcion
Excepcion riba e regla aki ta e clausula di huur inclui den articulo 3:264 BWA. Si previo e convenio di huur ta inclui den un acta hipotecario cu e propietario no por huur sin permiso di e dunador di hipoteca, y e propietario actua en contra di esaki, e convenio di huur si ta termina cu e benta na findishi.

Compromiso cu requisito di convenio di huur
E propietario nobo ta bira esun cu ta pone e propiedad na huur, cu en principio tur derecho y obligacion corespondiente. E anterior propietario no por atende reclamo pa cumplimento cu obligacion (por ehempel, elimina defecto presente), a lo maximo compensacion pa daño cu e lo a causa. Hasta ora e propietario nobo na momento di e traspaso no tabata na altura di e huur, e ta mara na e convenio di huur, tanten e inquilino tabata den loke ta huur na momento di e traspaso.

Propiedad economico
Cambio di propiedad economico no tin consecuencia pa e inquilino. Den e caso ey e propietario ta keda e propietario huridico y tanten esey ta asina, e ta e propietario cu ta pone e propiedad na huur y ta e punto di contacto pa e inquilino. E solo titulo di compra no ta suficiente pa haci e propiedad pasa pa otro. (art. 3:84 BWA).

Traspaso di clausula
Conforme articulo 7:226 inciso 3 BWA, ta traspasa solamente e clausulanan cu tin relacion directo cu e hecho di tin un asunto pa cual e inquilino ta paga un contraprestacion. Cual clausula ta pasa ta depende di e circunstancianan di e caso, pero en principio clausulanan di prijs di huur tocante e tamaño di loke ta huur sí ta pasa, mientras cu clausula mara na persona y opcion di compra no ta bay.

Derecho obligatorio
E stipulacion ta di derecho obligatorio pa inmueble construi. Banda di esey ta menciona explicitamente cu e prohibicion di terminacion di e huur sin permiso di huurcommissie, no por ser evadi (art. 7:226 lid 4 BWA).

Prohibicion limitacion di gozo (Verbod genotsbeperking beperkt recht)

A base di articulo 7:227 BWA ta resulta cu esun cu obtene un derecho di servidumbre riba un cura cu ta na huur caba, no por eherce e servidumbre aki di tal forma cu e ta limita e derecho di gozo di e inquilino. Un tenedor di hipoteca cu ta desea di haci uso di e facultad encuanto un clausula manera intenciona den articulo 3:267 BWA, por ehempel no por haci esaki di tal manera cu e ta stroba un inquilino, di ken e huur ta data di antes cu a establece e hipoteca, den gozo di e asunto.

Notifica terminacion (Opzegging)

Den articulo 7:228 BWA tin describi e regla principal encuanto terminacion di huur. Si a establece e huur pa un tempo defini, e huur ta termina ora e tempo ey vence, sin cu ta necesario notifica di e terminacion. (inciso 1). Si a establece e huur pa tempo indefini, o ta extende esaki pa tempo indefini, e ta termina a traves di notificacion. Den caso di huur di inmueble ta vigente un termino di preaviso di por lo menos un luna (inciso 2). E stipulacion aki ta di derecho regulatorio.

Atencion: : den caso di terminacion di huur di un vivienda di parti di e propietario, ta rekeri permiso di Huurcommissie (art. 7:248 BWA). Permiso di Huurcommissie tambe ta rekeri pa terminacion di parti di e propietario di e espacionan comercial menciona den articulo 7:274 BWA. E stipulacion aki ta di derecho obligatorio y partidonan no por desvia di esaki.

Morto di partido

Morto di inquilino o propietario en principio no ta haci cu un convenio di huur ta termina (art. 7:229 lid 1 BWA). Si e inquilino fayece y e facultad pa onderhuur no ta exclui, lo ta rasonabel cu e propietario por confia cu ta finaliza e periodo di huur conveni. Si e facultad pa onderhuur ta exclui, anto e herederonan por termina e convenio durante seis luna despues di fayecimento di e testador (erflater) (art. 7:229 lid 2 BWA. Si tin mas heredero di e inquilino, e propietario mester duna su cooperacion na e adhudicacion di e derecho y obligacionnan for di convenio di huur di parti di e herederonan na un o mas di nan, a menos cu tin obhecion rasonabel (art. 7:229 lid 3 BWA).

Uso continua

Si e inquilino despues di termino di e convenio di huur, cu aprobacion di e propietario, ta mantene uso di loke ta huur, cu esaki ta extende e convenio di huur original pa tempo indefini, salvo un intencion diferente di partidonan (art. 7:230 BWA).