Definicion vivienda

Si un convenio di huur ta concerni un vivienda, e inquilino tin extra proteccion di huur. En vistadi e proteccion bastante amplio e definicion y limitacion di e concepto vivienda ta di gran importancia. Bao di vivienda (woonruimte) ta comprende un inmueble construi cu ta pone na huur, cu tur e elemento inmueble perteneciente. Un parcela di tereno cu ta pone na huur pa usa como vivienda tambe ta cay bao di e definicion di vivienda (woonruimte) (art. 7:231 lid 2 BWA).

Excepcion di proteccion di huur
Si un convenio di huur di vivienda ta duna derecho na uso cu segun su caracter ta solamente di corto duracion, e inquilino no tin derecho riba proteccion di huur y henter e quinto seccion di titulo 7.4 BWA no ta aplicabel (art. 7:232 BWA). Den caso di e criterio ‘segun su caracter solamente di corto duracion’ mester pensa riba convenio pa uso di vivienda di vacacion, acommodacion di hotel y pension, vivienda di trueque, y similar.

Huur comparti (Medehuur)

Huur den caso di matrimonio
E esposo(a) di un inquilino ta, a base di articulo 7:233 inciso 1 BWA, ta pa ley co-inquilino (medeinquilino), tanten e vivienda ta residencia principal di e esposo, irespecto si a cera e convenio di huur antes o despues di contrae matrimonio. E inquilino y co-inquilino ta, pa cu e propietario, en principio personalmente responsabel encuanto e obligacionnan for di e convenio di huur (art. 7:233 inciso 2 BWA). Si e convenio di huur termina pa cu e inquilino, e co-inquilino pa ley ta bira inquilino (art. 7:233 inciso 3 BWA).

Divorcio o separacion legal
Den caso cu e esposo(a), relaciona cu un peticion di divorcio o separacion legal, no tin uso di e vivienda matrimonial, esaki no tin influencia riba su residencia principal (art. 7:233 inciso 4 BWA). Den caso di divorcio o separacion legal un esposo(a) por haci peticion na huez pa determina ken di e esposonan lo ta inquilino di loke ta huur. Huez ta stipula tambe e fecha inicial di huur di e esposo(a) aki, na cual momento e huur cu e otro esposo ta termina (art. 7)233 inciso 5 BWA).

Fayecimento di inquilino
Den caso di fayecimento di e inquilino e esposo(a) ta continua e huur como e inquilino. E por termina e huur dentro di seis luna despues di e fayecimento, entrante e prome dia di e segundo luna despues di notifica e terminacion (art. 7:234 BWA).

Limitacion di proteccion di huur
Den caso cu un esposo(a), cu a haci un apelacion riba articulo 7:233 y 234 BWA, bolbe casa, e esposo(a) nobo no por, relaciona cu e mesun vivienda, apela mas na e articulonan antes menciona (art. 7:235 BWA).

Proteccion di partnernan no casa
Den casoocu dos persona a biba hunto pa diez aña o mas manera esposo, anto e articulonan 7:233 te cu, y inclusive 235 BWA, ta di aplicacion corespondiente (art. 7:236 BWA).

Derecho obligatorio
No por desvia di e articulonan 7:233 te cu, y inclusive 236 BWA na desbentaha di e esposo(a), o e partner indica den articulo 7:236 BWA, (art. 7:237 BWA). No por desvia di e stipulacionnan den e seccion aki encuanto huur di un vivienda na desbentaha di e inquilino (art. 7:238 BWA). Esaki ta significa cu violacion di un stipulacion di e seccion aki ta conduci na anulabilidad (art. 3:40 inciso 2 BWA) y cu solamente e inquilino por elimina.

Prijs di Huur

A base di articulo 7:239 BWA ta vigente encuanto huur di vivienda y cierto espacio empresarial en principio e prijs di huur cu e partidonan a conveni (art. 7:274 BWA). Sin embargo, e inquilino o e propietario por laga huurcommissie stipula e prijs di huur, si e valor di mercado di loke ta huur sin estado no habita ta Afl. 150.000,- o menos (art. 7:240 lid 1 y 274 BWA). Pa demas regla y procedimento encuanto e stipulacion di prijs di huur pa huurcommissie, mira < de Huurcommissie -> Huurprijsvaststelling >

Terminacion di parti di propietario

Conforme articulo 7:248 jo 274 BWA, huur di un vivienda o espacio empresarial no ta termina cu notificacion di terminacion di e propietario, si no a obtene permiso di Huurcommissie pa e terminacion. Pa demas regla y procedimento encuanto notificacion di terminacion di parti di e propietario, mira < de Huurcommissie -> Toestemming tot beeindiging >