Tin ora e cliente ta acerca Sedeco cu e meta pa haya un miho imagen di su posicion huridico. Den un caso asina ta necesario pa revisa mas specificamente e circunstancianan di e disputa particular di huur o consumidor, pa asina yega na un conseho huridico miho, cu ta orienta riba e caso individual. Pa logra e meta aki ta necesario pa pone disponibel tur informacion y documento relevante. Ya cu ley encuanto derecho di huur y consumidor pa un parti so ta consisti di derecho obligatorio (dwingend recht), e stipulacionnan den e convenio cera ta valido y esencial pa yega na un conseho corecto.

Den caso cu e cliente mes no a haci un esfuerzo pa resolve e disputa cu e propietario o empresa, ta sali un conseho pa haci esaki ainda. Pa esaki nos tin riba nos website un serie di carta modelo/ehempel disponibel, cu e cliente por usa pa trata di resolve e disputa cu e empresa o e propietario. Nos consulentnan por asisti den scoge e carta modelo corecto y den yena e informacion relevante.