Periodo di validez di cadeaubon

Cadeaubon ta ser usa frecuentemente cu cumpleaños y otro aniversario. Hopi biaha hende no sa kico pa duna un otro persona, pero nan no kier yega man bashi na un fiesta. Un envelop cu placa ta mustra laf y no personal. Hopi biaha e cadeaubon aki ta resulta den un cashi o tas y ta despues di basta tempo ta bin descubri nan. E pregunta ta si e cadeaubon ta valido ainda o cu e tin un periodo di validez limita.

No tin regla claro tocante duracion di e validez di cadeaubon. E duracion di validez di un cadeaubon por ser considera un condicion general den sentido di articulo 6:231 BWA. Cu e compra di e bon e cumprado ta acepta e validez di e condicionnan aki. Di otro banda ta existi un obligacion di informa di parti di e bendedo, e ta obliga di duna e condicionnan general vigente na e cumprado (ta poni riba e bon) o pone esaki disponibel pa revision (art. 6:233 sub b jo. 6:334 BWA). En principio ta bende tres tipo di cadeaubon:

1. Cadeaubon sin fecha;
2. Cadeaubon cu solamente un fecha di emision;
3. Cadeaubon cu tanto un fecha di emision como di vencimento.

Na compra di un cadeaubon e cumprado ta cera un convenio cu e bendedo/tienda. De mayoria di caso e cumprado ta un consumidor; un persona natural cu no ta actua den ehercicio di un profesion o empresa (art. 7:5 BWA). En principio e bendedo mes por determina kico ta e periodo di validez di e bon, pero esaki den conformidad cu articulo 6:233 sub a BWA no por ta irasonabelmente di peso pa e cumprado.

Den conformidad cu articulo 6:236 sub g BWA (lista preto) ta indica un demanda cu un periodo di verjaring di menos cu un aña como irasonabelmente oneroso. Un cadeabon mester ta valido por lo menos un aña despues di e fecha di emision. Esaki no ta implica cu un periodo di validez di un aña di mes ta rasonabel. Esaki ta depende di e circunstancianan di e caso. E tipo di servicio o producto y e disponibilidad di eseynan ta factor cu por hunga un papel den determina e grado di razonabilidad di e termino di validez di un cadeaubon. SI ta asina cu esun cu ta afirma, e consumidor, mester demostra cu e duracion di validez den e caso concreto ey ta irasonabelmente pisa.

Cadeaubon a bira popular como regalo na ocasion di fiesta. E duracion di validez di e bonnan aki ta diferencia di tienda pa tienda. Cadeaubon sin fecha ta valido sin limite. Si tin un fecha di emision riba e bon, anto esaki ta vence entrante e fecha final. Un duracion di validez di menos di un aña ta ser indica como irasonabelmente oneroso pa e consumidor. Por ta anto cu e cadeaubon despues di tempo, legalmente no ta valido mas. A pesar di esey ta recomendable pa no benta e cadeaubon afor. Cierto tienda(nan) ta dispuesto pa acepta cadeaubon ‘venci’ ainda.